Mga Pionero ng MLBB sa Pilipinas, ibinahagi ang kanilang mga kuwento sa ika-10 anibersaryo

Nagsimula ang ilan sa mga pinakamahuhusay na manlalaro at coach ng Mobile Legends: Bang Bang sa Pilipinas sa simpleng pagkakataon bago maging pundasyon ng kanilang karera sa esports.

Nakilala nina ONIC Philippines’ Jeniel "Haze" Bata-Anon at Angelo "Pheww" Arcangel ang laro sa pamamagitan ng kanilang mga kapatid, habang si Team Liquid Philippines’ Karl "KarlTzy" Nepomuceno ay nagsimula matapos makapanood sa kapitbahay.

“Yung first time ko nakita yung MLBB, nakita ko siya doon sa kapit-bahay ko na naglalaro siya ng Mobile Legends. Nagustuhan ko talaga siya kasi sobrang convenient siya laruin kasi sa mobile lang and anywhere malalaro mo lang,” sabi ni Nepomuceno.

Nadiskubre naman ng veteran coach na si Kristoffer "BON CHAN" Ricaplaza ang laro noong night shift siya bilang IT employee, habang si Hall of Legends inductee na si Francis "Ducky" Glindro ay nag-download para sa isang office tournament.

“Nung nag-work ako as an IT and night shift, yung kasamahan ko may nilalaro siya sa phone niya. Nakita ko parang Dota yung nilalaro niya. Tinry ko rin hanggang sa nahook agad ako doon sa game. Pag-uwi ko sa bahay, hindi na ako natulog, naglaro ako diret-diretso,” ayon kay Ricaplaza.

Para kay Team Liquid Philippines’ Jaypee "Jaypee" Dela Cruz, isang post sa Facebook ang naging daan.

Marami sa kanila ang naakit sa accessibility ng laro, na nag-alok ng pamilyar na karanasan ng PC MOBA sa isang smartphone.

Para sa mga veteran, halos hindi na nila makilala ang bersyon ng laro ngayon kumpara sa kanilang unang nilaro isang dekada na ang nakalipas.

“Sobrang unrecognizable na talaga ngayon kasi sa drafting pa lang, kailangan sobrang pinag-iisipan na. Pag nalugi ka sa drafting tapos magaling din kalaban mo, sobrang hirap na ipanalo,” sabi ni Nepomuceno.

Itinuturo ng ilang coach ang pagpapakilala ng mga dedicated role bilang isa sa pinakamalaking pagbabago sa kasaysayan ng laro.

“Dati wala siyang mga dedicated role. Walang EXP lane, walang gold lane, walang jungler, walang roam. Basta kung saan mo trip pumuwesto, puwede. Simula nung nagkaroon ng dedicated roles sa bawat lane, totally nag-iba yung sistema kung paano nilalaro yung game,” paliwanag ni Ricaplaza.

Naniniwala si Glindro na ang pag-usbong ng jungler role ang nag-reshape sa MLBB.

“I honestly believe na yung pinakamalaking pagbabago was when nagkaroon ng dedicated jungler role. Nagkaroon ng dedication para sa specific roles and I think that's one of the biggest moments that shaped what ML is now,” sabi niya.

Sang-ayon din si Arcangel, na ngayon ay isang coach na, na ang dedicated hero/role system ang pinakamalaking ebolusyon.

Naniniwala si Dela Cruz na ang mga bagong update sa mapa ang nagtulak sa laro patungo sa mas malalim na estratehiya.

Naniniwala si Ricaplaza na mananatiling malakas ang laro dahil sa accessibility nito.

“As long as buhay yung smartphone, magtatagal at magtatagal yung MLBB,” aniya.

Idinagdag niya na laganap na ang laro sa Pilipinas.

“Para sa akin dito sa Pinas, wala siguro gamer na hindi nakakaalam ng laro ng MLBB. Kahit hindi nila nilalaro, alam pa rin nila kung ano yung game na yan,” dagdag ni Ricaplaza.

Wala ring nakikitang palatandaan ng pagbagal si Arcangel.

Para kay Bata-Anon, nakasalalay ang kahabaan ng buhay ng laro sa relasyon sa pagitan ng komunidad at mga developer.

“As long as may nagsusuporta sa game. Tapos syempre yung mga devs, nakikinig din sa mga tao kung paano, yung pwedeng mangyari, pwedeng mga suggestions. Ayun pa rin. Hangga’t sinusuportahan ng mga tao na naglalaro, feeling ko tatagal pa rin siya,” sabi niya.

Aminado si Glindro na hindi niya inasahan na aabot ang MLBB sa ika-10 anibersaryo nito.

Sa nakalipas na 10 taon, naging tagpuan ang MLBB ng ilan sa pinakamahalagang sandali sa kasaysayan ng esports sa Pilipinas, kabilang ang unang world championship ng bansa.

Para kay Nepomuceno, nangunguna ang historic na M2 World Championship run ng Bren Esports.

“Yung pinaka-memorable talaga sakin noon yung M2 run namin kasi sobrang favorite ko yun. Funnel strat pa nun and ako yung jungler, enjoy ko talaga yung game pag ganun.,” sabi niya.

Para naman kay Glindro, ang parehong torneo ang nagbukas ng maraming oportunidad para sa mga manlalarong Pilipino.